Autoren-Archive: Dipl.-Ing. Faton Piraj

1. Besoj fuqishëm së qëllimi i Serbisë dhe miqve të saj, të kamufluar nën petkun e Gjykatës speciale (dhe Eulexit…), është që të dënojë sa më shumë komandantë të UÇK-së për KRIME LUFTE
2. Në këtë mënyrë ajo shpreson që të arrijë ta shpallë ndërkombëtarisht UÇK-në Organizatë Kriminale Terroriste (Një organizatë është patjetër kriminale ose terroriste, kur udhëhiqet nga kriminelë LUFTE të dënuar në procese gjyqësore ndërkombëtare)
3. Pasi ta arrijë këtë, ka në plan të përpiqet përmes mekanizmave ndërkombëtarë, ku mund ta shfrytëzojë ndikimin e Rusisë dhe Kinës, të arrijë ta pengojë Kosovën në zhvillimin e shtetësisë së saj, madje ndoshta edhe ta vejë në dyshim shtetin e pavarur të Kosovës, duke e kontestuar legalitetin dhe legjitimitetin e tij.
4. Pas kësaj me siguri së shpreson që Rusia do ta përkrahë në RIPUSHTIMIN E KOSOVËS dhe nuk ka kush që e arsyeton të kundërtën. Kush i mbron „kriminelët“ dhe shtetin që „ata e shpallën“ sot? Më çfarë faktesh do të dilte ShBA kundër tyre?
5. Në funksion të kësaj janë edhe zotimet e kryeministrit të kontestuar Avdullah Hoti të bëra në Uashington, sidomos autostradat, hekurudhat, dalja e Serbisë në det dhe pauza një vjeçare e anëtarësimeve në organizatat ndërkombëtare.
6. Plani mund edhe ti dështojë Serbo-Rusisë, POR JAM SHUMË I BINDUR SË KY ËSHTË QËLLIMI I KREJT KËSAJ. Gjërat po duken qartë.
7. Unë jam PRO DËNIMIT të atyre që bënë krime pas lufte, por edhe gjatë luftës kundër shqiptarëve të PAFAJSHËM. Por KURRSESI PËR KRIME LUFTE, të mirëkuptohemi.
8. Prandaj o shqiptarë kujdes, „Mos e mbytni djalin, për inat të nuses“ (pop.) Kështu do t’ia fikni derën vetvetes.

ME UÇK-në e VËRTETË.
F.P.

Këtu problemi është te „pyetja inekzistente“ që sqarohet në psikologjinë e arsimit dhe që NDALOHET ti parashtrohet nxënësit.
P.sh.: „Për sa kohë sillet Toka rreth Hënës?“, sepse nuk sillet, ose
„Kur ka ndodhur liberalizimi i vizave për Kosovën?“ sepse nuk ka ndodhur (dhe s’ka për të ndodhur me këta politikanë qyqarë).
Pra, pyetje (temë) inekzistente është „Kush po e fyen UÇK-në?“, sepse askush nuk po e fyen. Nuk identifikohet UÇK-ja nga një individ, apo një grup, që do të mund të ishte i përfshirë në ndonjë krim.

Pyetje tjetër inekzistente është „Kush po i fyen ushtarët e lirisë?“ sepse askush nuk po i fyen. Kontestuese është se kush ishte ushtar i lirisë, apo çlirimtar.
60.000 apo vetëm 10.000 apo vetëm 2500 dëshmorët?!
Gjithashtu janë kontestuese deklaratat e disa “çlirimtarëve” se herë kanë luftuar herë kanë qenë larg fronteve të luftës. Këtu “qëndron lepuri”.
Këto reagime kinse mbrojtëse të UÇK-së apo ushtarëve të lirisë, më tepër janë manipulim me opinionin sesa diçka reale.

Kjo, ngase ne pamë standarde të dyfishta në vlerësimin e deklaratave të njëjta të zyrtarëve të ndryshëm.
Deklarata e një këshilltari të ish kryeministrit nga radhët e LVV dhe e Presidentit të vendit nga radhët e PDK-së ishin identike.
Po ashtu ishte shumë vulgare akuza e një kryetari të një partie të vogël “PEK” që u shkëput nga “Nisma”.
Edhe kryetari i LDK-së në përballje me kryetarin e AAK-së bëri deklarata akuzuese të rënda.
Por për “çudi” vetëm deklarata e këshilltarit të ish kryeministrit bëri jehonë.

E kjo tregon se UÇK-ja po përdoret në debatet politike me qëllime denigruese, e jo mbrojtëse të saj, me qëllime kusuritjeje politikanësh mes vete, e jo dashamirëse ndaj luftëtarëve të lirisë. Kjo tregon po ashtu se jo vetëm shteti, por edhe mediat analistët dhe madje edhe shoqëria civile është kapur.

Fyerje e madhe, në të vërtetë, i është bërë UÇK-së dhe luftëtarëve të lirisë kur është miratuar ligji për Gjykatën Speciale. Këtu UÇK-ja është paragjykuar si kriminale. Deputetët, që e votuan këtë ligj, kanë bërë një tradhti të hapur ndaj UÇK-së.

Edhe po që se do ta themelonte OKB-ja, në rast kundërshtimi nga Kuvendi ynë, megjithëse juridikisht OKB nuk mund të themelojë Gjykatë NJË-ETNIKE, pasojat do të ishin më të vogla, ngase nuk do të kishin çare pa i bërë edhe krimet e Serbisë objekt të gjykatës së tillë.
Sloganet “Votojeni Gjykatën, sepse do ta themelojë Rusia në OKB”, e të ngjashme, kishin për qëllim amnistimin e Serbisë nga krimet e bëra në Kosovë. Kjo, ngase gjykata është gjykatë, pa marre parasysh kush e themelon. Çfarë bëri pushteti në Kosovë? Vetëm se e amnistoi Serbinë me këtë votim. Gjykata me juridiksion të vlefshëm ndërkombëtar u themelua ashtu edhe ashtu, por pa krimet e Serbisë si objekt.

Të nderuar zotërinj, UÇK-ja është e pafyeshme, sepse luftoi për liri. Luftëtari i lirisë edhe mund të dënohet, por kurrë të fyhet. Hiqeni mendësh. Krimi është individual dhe kurrsesi nuk mund ti mvishet tërë UÇK-së.
Por një kolektivizim i krimit po ndodh edhe nga kinse “mbrojtësit e luftës çlirimtare”, ngase ata, nga tendenca vetëmbrojtëse, po e barazojnë vetveten me tërë UCK-në dhe kështu po rrezikojnë që fajin eventual individual të vetin ta përgjithësojnë dhe ta gjuajnë në krahët e tërë Ushtrisë Çlirimtare.

Në përgjithësi në Kosovë kemi të bëjmë me shumë pyetje apo tema inekzistente. Një nga to është edhe “Antiamerikanizmi” por për këtë një herë tjetër.

F.P.

Viti i ri shkollor nuk solli asgjë të re.

Kam qenë, jam dhe do të jem tepër i mllefosur më dhunën nëpër shkolla, posaçërisht ndaj fëmijëve nga ana e mësuesve (kujdes: MËSUESIVE…).
Por kam qenë, jam dhe do të jem akoma më i mllefosur me prindërit që nuk i mbrojnë fëmijët e tyre (kujdes: PRINDËRIT…)
Edhe të parët edhe të dytët do të duhej ti edukonin fëmijët, apo jo?!

Prindi përmes edukatës e mbron më së miri fëmijën e vet.
Mësuesi përmes edukatës e qorton më së miri nxënësin e vet.

Por pyetja, që bëhet vetvetiu, është:
„A mund të edukojë ai, që vetë nuk është i edukuar?“

Një decenie para dhe gati dy decenie pas çlirimit nuk përmirësuam gjë. Decenia para çlirimit ishte më dëmprurësja… pa fajin tonë. Mirëpo, edhe pas çlirimit, neve vetëm së po na përcillet mos edukimi brez pas brezi dhe nuk do të ndryshojë kjo deri në Ditën e Kiametit, siç duket.

Urgjentisht duhet të bëhet depolitizimi i arsimit në Kosovë (nga kompetentët). Tepër e papranueshme është që drejtorët dhe arsimtarët të caktohen drejtpërdrejt nga politika. Kjo duhet menjëherë të ndryshojë.

F.P.

(Rahmet për së gjalli ambasadores Tracey Ann Jacobson. Me një fjali e pat shkruar krejt historinë e pasluftës në Kosovë)

Qeveria (teveqelja) e Kosovës, më shkurt kryeministri Hoti (Koti) nënshkroi si i vetëm një dokument, i cili përfshinte disa zotime të tija kundrejt Serbisë.

Për çdo mendje të shëndoshë, ky teatër mbi „marrëveshjen historike“ është kulmi i injorancës institucionale shtetërore.
Duke shikuar një nga një pikat e kësaj “marrëveshjeje” fitohet përshtypja se qeveria (teveqelja) e Kosovës përfaqëson Serbinë.

Qysh në fillim të tekstit thuhet që duhet implementuar marrëveshjet e nënshkruara në shkurt të 2014, që kanë të bëjnë me lidhjen mes Beogradit dhe Prishtinës (siç thuhet, e jo Kosovës e Serbisë) përmes autostradave, në mënyrë që Serbisë ti mundësohet dalja në Adriatik. Pra nënkuptohet që kryeministri i atëhershëm Hashim Thaçi, i ka nënshkruar këto marrëveshje. Për daljen e Serbisë në Adriatik, për të cilën ajo i shkaktoi disa luftëra, meritor është Avdullah Hoti po aq sa edhe Hashim Thaçi.

Rastisi që “Demarkacionin” me Malin e Zi ta implementojë Isa Mustafa, kurse “Daljen në Adriatik” të Serbisë Avdullah Hoti? Nuk besoj që kjo është rastësi. LDK dhe PDK janë bërë bashkë gjithnjë për të keqen e Kosovës. Andaj thirrjet e shumë “analistëve” për bashkim të forcave politike nuk kanë kurrfarë kuptimi, sidomos kur i drejtohen Lëvizjes Vetëvendosje. Nuk mund të bëhet edhe kjo parti tash bashkë me ta për të keqen e Kosovës, të cilën rrugë AAK dhe Nisma po e ndjekin që nga fillimi, pa pardon.

Më tutje bie në sy, që vetëm “Merdarja” përmendet si kufi, ku duhet të implementohet marrëveshja mbi pikat e përbashkëta kufitare. Kjo nënkupton që pikat tjera kufitare mund të ndryshojnë edhe pozitën edhe formatin, gjë që na bën të dyshojmë se shkëmbimi i territoreve, si ide e qëllim, akoma ekziston.

Çështja e “Liqenit të Ujmanit” që është futur në zotimet e Avdullah Hotit (që po keqemërtohet si “marrëveshje”) sigurisht që është një vepër antikombëtare që mund të hyjë në rangun e tradhtisë kombëtare, sipas Kushtetutës së Kosovës. “Liqeni i Ujmanit” den baba den ka qenë në Kosovë. Aty nuk ka çfarë kërkon Serbia. Ajo mund edhe ta uzurpojë me forcë, por ti njihet administrimi i saj mbi këtë liqe me zotim (marrëveshje), kjo kurrsesi nuk do të duhej të ndodhë.

Në këtë “marrëveshje” janë futur po ashtu religjionet, duke vënë theksin te kishat ortodokse dhe eksterritorialiteti i tyre, që sërish përbën një dështim të delegacionit të Kosovës, ngaqë anashkalohet feja e shumicës në Kosove. Vetëm kisha ortodokse dhe tempujt hebrenj po u dashka të mbrohen? Po xhamitë e shkatërruara gjatë luftës a nuk u dashka të mbrohen?! Shteti laik duhet të ketë qasje të njëjtë ndaj religjioneve dhe besimit si e drejtë e pakontestueshme elementare e njeriut.

Pika tjetër e futur pa nevojë, ajo mbi dekriminalizimin e homoseksualitetit, tregon po ashtu qasjen shumë primitive që ka Grenell ndaj Kosovës. Kosova nuk i ka penguar paradat e gaj-ve. Serbia ka qenë ajo, që i ka ndaluar, madje i kanë përgjakur pjesëmarrësit aty. Të barazohet Kosova dhe Serbia këtu është e padrejtë dhe qëllimkeqe. Pyetni udhëheqësit tanë, që morën pjesë në këto parada, a ua çmoi Grenell këtë “kontribut”?!

Më tej, moratoriumi për anëtarësimin në organizatat ndërkombëtare i Kosovës të barasvleftësohet me moratoriumin e Serbisë për çnjohjet, është po ashtu një e padrejtë. Serbia ishte agresori, lufta jonë ishte për liri dhe mbrojtëse. Vendimi i “Gjykatës Ndërkombëtare të Drejtësisë” na ka pranuar pavarësinë si të ligjshme. Ne kemi të drejtë ta afirmojmë pavarësinë. Serbia pra vepron kundërligjshëm kur cyt çnjohjet.

Dhe në fund, mbi njohjen nga Izraeli. Kjo njohje, megjithëse e mirëseardhur, i ka “dreqësitë” e saja mbrapa. E para, vendosja e ambasadës së Kosovës në Jerusalem, i cili nga shumë shtete arabe njihet si i okupuar, mund të na bëjë dëm të madh në Ligën Arabe (madje ndoshta në BE), nga ku mund të vijnë çnjohjet pas angazhimit të Serbisë.
E dyta, unë nuk besoj që Izraeli na ka njohur pa çmim. Mendoj se Trepça është gjahu i tyre dhe madje besoj që u është premtuar. Megjithëse kjo mbetet një spekulim, them se, duke i njohur Izraelitët, nuk është larg mendësh.

Dëmi nga anëtarësimi në „Minishengen“ është më tepër se i qartë. „Minishengeni“ është në fakt RFJ-2….

Përfundim:
“Marrëveshja” pra zotimi i qeverisë së Kosovës ndaj Serbisë, nën ndërmjetësimin e SHBA-ve, është e papranueshme, ngase në asnjë pikë nuk ka diçka të mirë për Kosovën dhe shqiptarët, përveç një njohjeje mjaftë problematike dhe njohjes së diplomave (që nuk ka efekt, ngase Serbia nuk i punëson ashtu edhe ashtu shqiptarët).
Apeloj në Kuvendin e Kosovës, deputetë të ndërgjegjshëm, të mos ushqehen gabimisht me fjalën “Amerika” e në të vërtetë të vihen në shërbim të Serbisë. Kjo “marrëveshje” ASSESI nuk duhet të kalojë në Kuvendin e Kosovës. Përndryshe “Demarkacioni-2” do të përsëritet. Asgjë nuk do të fitojë Kosova, kurse Serbia do ti bie kryq e tërthor Kosovës e Shqipërisë pa e pyetur askënd dhe pa pasur kurrfarë ngarkesash financiare. Kamionët dhe trenat e Serbisë të kalojnë kështu mbi tokën që me shekuj e përgjakën, kështu edhe Zoti do të na mallkojë, se lëre më gjaku i dëshmorëve dhe viktimave të pafajshme të masakruara nga pikërisht Serbia e udhëhequr mu nga njerëzit e njëjtë, të cilët e udhëhoqën edhe gjatë luftës.

F.P.

Protesta është INSTITUCION I DEMOKRACISË

Ta ndryshojmë mentalitetin e ngelur nga ish sistemi socialist-komunist drejt mentalitetit demokratik. Ju lutem!

1. Protesta është INSTITUCION i demokracisë.
2. Policia nuk e ka detyrë shpërndarjen apo pengimin e protestës, por E KA DETYRE sigurimin e këtij institucioni dhe mbrojtjen e protestuesve si pjesëtare të këtij institucioni demokratik.
3. Aktet e policisë sonë, që i shohim ne, fatkeqësisht janë përcjellë më tej nga reagimet e policisë së ish sistemit social-komunist, që DETYRË e kishte pengimin dhe shpërndarjen e protestave „kundërrevolucionare, iridentiste, nacionaliste, separatiste…“ e çka nuk…
4. Policia, nëse e shperndan protestën, ajo faktikisht e sulmon institucionin demokratik. E në demokraci sulmi kundër institucioneve të saj është i papranueshëm.
5. Kundërreagimi i Institucionit Demokratik të Protestës (protestuesve) sidoqoftë në këso raste, është krejt i natyrshem dhe i paalternativë, ngase është reagim vetëmbrojtës.

F.P.

P.S.
Këto gjera kështu kuptohen.
Që 3 decenie po e shoh në Austri se si funksionon demokracia.

Eeehhh kjo Gjuha e jonë Shqipe sa më dhimbset.

Koha e Tashme e saj „(po) punojmë, (po) punësojmë, (po) investojmë“ është duke pësuar debakël. Sidomos tek „Udhë-heqësit“. Ata po e tenderojnë Kohën e Ardhshme „do të punojmë, do të punësojmë, do të investojmë“ NESËR. E kjo „NESËR“ mbetet vetëm nesër, „SOT“ nuk bëhet dot.

Edhe një fjalë e pëlqejnë tepër Rrugë-Hequrit (më tepër se Encën, apo BMW-X6-shin), e ajo fjalë e dashur është „DUHET“. Ata investojnë në „DUHET“, çfarë profiti!!!
Ndonjë „fshatar“ i varfër do të shprehej „DUHEM“ apo „DUHESH“…, bukur kjo, se do të dihej KUSH DUHET. Por a votohet kjo see? I kanë numrat dhe të mbysin.

Këtyre „qytetarëve“ milionerë të PAHEQUR e PAPREKUR, nuk po ju dihet, po thonë DUHET. E kush duhet??? ASKUSH.

Hej, e di ore se „gjuhëtarët ju kanë faj“ madje edhe për VOTIMIN E GJYKATËS SPECIALE.

Ju infektoheni, kurse tjetërkush paska faj, edhe pse ai tjetri nuk është infektuar fare.

Populli paska faj, pse ju nuk dini të menaxhoni. Populli paska faj për çdo gjë?! Ndoshta synoni ta ndërroni popullin tonë me japonezë apo skandinavë, që do ti sillni pasi ti përzeni të gjithë shqiptarët? Edhe këtu ju nuk do të kishit faj…. apo?!

Po pra, vetëm të tjerët kanë FAJ. Kurrë JU.

F.P.

(Për shumëkënd ky shkrim do të duket i çuditshëm, por për shumëkënd jo. Por për ta thënë një të vertetë duhet guxim intelektual dhe sakrificë, për këtë jam i vetëdijshëm)

Unë mendoj që amerikanët e kishin në plan, duke i bërë Thaçit shantazh tinëz, të shkëmbejnë territore. Prandaj edhe Haga (BE-ja) e bëri publike aktakuzën kundër Thaçit dhe Veselit.

Gazeta „Frankfurter Allgemeine Zeitung“ shkruan titullin:
„Amnestie? Niemals.“

Pse amnisti? Kujt amnisti?

Përgjigjja logjike do të ishte: Amnisti Thaçit pasi t’ua kryente amerikanëve punët rreth shkëmbimit.
Por tash doli në publik… s’mund ta fshehin më.

Këtë mes rreshtash po e thotë gazeta „Frankfurter Allgemeine Zeitung“.

Shkëmbimi i territoreve po kam frikë se mund të ndodh shkaku i marrëdhënieve të ngushta të Trump me Putinin. Putini ndihmoi zgjedhjen e tij president, e ky do t’ia bënte një favor atij.

Shantazhi Thaçit po i bëhet përmes prokurorit amerikan (të cilit edhe Serbia po i ndihmon, e qartë), prandaj BE-ja(Haga) na tregoi ç’po ndodh, duke e publikuar aktakuzën, ku qenka „punuar që 20 vjet“ (Ambasada Amerikane e tha këtë).

Është shumë e qartë pra pse është mbajtur fshehur kjo aktakuzë: Krejt, që Thaçi ua ka nënshkruar të huajve, prej demarkacionit e deri te Zajednica, i paska bërë, deshi s’deshi, me zor ose me shpresë që nuk do të dalë në gjyq.

Pra krejt ky informim po na bëhet, ngase Gjermania (BE-ja) është strikt kundër shkëmbimit territorial mes Kosovës e Serbisë.

Shumë mirë që po dihet tash, sepse diçka që ekziston për shantazh, më mire është të dihet. Prokurori qenka i Grenellit (Trumpit) dhe që 20 vjet qenka punuar për këtë aktakuzë, merreni me mend.

E vërteta duket kështu:

Publikimi i aktakuzës e ka qëllimin e pengimit të shkëmbimit të territoreve, që me gjasë do ta bënte një „Palestinë“ të re në Ballkan dhe këtë Gjermania assesi nuk e lejon.
Administrata e Trumpit (e SHBA) u tregua tejet e papërgjegjshme kundrejt BE-së duke e anashkaluar nga procesi i filluar i një dialogu të përbashkët. Për problemet që do të mund të shfaqeshin zinxhir në Europë , natyrisht që Gjermania do ta kishte barrën më të madhe, prandaj nuk lejon.

Thaçit i mbetet vetëm mundësia e dorëheqjes nga pozita e presidentit, nëse nuk dëshiron ta dëmtojë shtetin e Kosovës. Ç’të bësh, llogaritë nuk i dolën të sakta.

Më 24.04.2020 qenka ngritur aktakuza, të nesërmen më 25.04.2020 Baton Haxhiu flet mbi amnistinë pas 20 vitesh në marrëveshjen që po përgatitej (kujtuam se mendoi veç në amnistimin e serbëve, por tash po shihet çka ka menduar). Pra Thaçi që atëherë paska ditur për aktakuzën dhe shkaku i kësaj duket se edhe u prish me BE-në. Por përse e mbajti për kaq kohë fshehur?!

Për fund:
Ne nuk do të kemi rahati, deri Serbisë t’ia „tregojmë dhëmbët“. Duke qenë se pushtetarët e derisotëm e përmendin vazhdimisht dialogun (thuaja se nuk kanë me çfarë të merren) në vend se ta bllokojnë Serbinë 100% me reciprocitet, i bëjnë oferta favorizuese, atëherë ne kurrë nuk do të jemi rahat prej tyre. Serbia vetëm gjuhën e forcës e kupton, e jo duke i ofruar diçka të dobishme sikur „Asociacioni i komunave me shumicë serbe“ p.sh. ngase në qoftë se Serbisë ia jep gishtin, ta kërkon dorën, në mos edhe krahun.

F.P

P.S.
Unë jam pro amerikan, pak më shumë pro shqiptar, por më së shumti jam pro së vërtetës.

E marrë nga „Kujtimet e mia“
(për mësuesit histori me vlerë)

Që nga klasa e 6-të e shkollës fillore merrja pjesë në garat e historianëve, ngase i nderuari mësuesi Mestan Krasniqi më mori në ekipin e garuesve edhe pse aty bënin pjesë nxënës të klasës së 8-të por kishte edhe ndonjë nga klasët e 7-ta.(Kam shumë „diploma“ dhe „mirënjohje“ nga ato gara)

Në klasën e 8-të mora sërish pjesë (Drejtor ishte Rasim Krasniqi).
Atë vit me mua (ndonëse kurrë më parë) mori pjesë edhe një Shok i klasës. Meqenëse vëllimi i revistës „Kekec“, nga ku dilnin pyetjet e garave, ishte tepër i madh dhe koha ishte mjaft e shkurtër, ne nuk arritëm të përgatitemi mirë, por vetëm në një masë të konsiderueshme.

Ne të dy ia dinim njohuritë dhe dobësitë njëri-tjetrit mjaft mirë.

Nga përvoja që kisha, ditën kur ishte gara, propozova, që nëse do të duhej, ne do të ndihmoheshim mes vete, sidomos në pjesët ku ishim më të fortë, ti ndihmojmë shoqi-shoqit, u morëm vesh për këtë, ngaqë do të uleshim sa më afër njëri tjetrit.

Ashtu edhe ndodhi. Shoku i klasës u ul jo shumë larg meje, dhe gara filloi.
Unë e plotësova testin në pjesët ku isha më i fortë. Duhej pra vetëm të kryqëzohen katrorët e përgjigjeve të sakta. Ishte numri i pyetjes p.sh. 1. dhe tri ose katër variante a), b), c), d).

Për fatin tim, shumica e pyetjeve ishin nga ajo pjesa ku unë isha më mirë i përgatitur.
Sipas marrëveshjes unë menjëherë ia pëshpërita Shokut të gjitha përgjigjet e mia shkurt: 1…a, 2…c, e kështu me radhë.
Pjesën, ku Shoku ishte më i përgatitur, unë nuk e plotësova, sepse pritja që të mi pëshpëriste njëlloj sikur unë përgjigjet e sakta.
Ishte diku 30% e testit nga pjesa ku ai ishte më i përgatitur.

AI KËTË NUK E BËRI.

Unë duke i thënë disa herë: „Shok, mi trego, si u morëm vesh?!“

AI MË DEGJONTE MIRË, por PËRKUNDËR KËSAJ NUK MË NDIHMOI.

E kishte planifikuar pra këtë dredhi.

Atëherë kah fundi, sipas asaj që dija, unë i plotësova.

Pra SHOKU, që i besova, MË MASHTROI.

Ai e zuri vendin e 1-rë apo të 2-të, e unë të 4-tin. Ai u kualifikua për në garat e Zagrebit, ME DIJEN TIME, kurse unë jo.

Këtë histori nuk mund ta harroj.

Një libër i shkruar nga një mësues i nderuar, e ka pra një gjë jo të sqaruar mirë në përmbajtjen e tij.

Keqpërdorime të tilla kam pasur shumë gjatë shkollimit, që prej kopjimit të detyrave të shtëpisë, dhënia e detyrave të provimit, pëshpëritja kur përgjigjeshin për notë, e deri te dalja bashkë vullnetarë, që unë të jem afër tyre, e tu bëhem sufler. Dhe u ndihmoja, pa sherr.
Mirëpo, e habitshme është, që edhe përkundër kësaj, në shoqëri nuk më ftonin, dilnin pa mua. Xhelozia nuk i lente. Xhelozia që unë nuk e kam kuptuar asnjëherë.
Kjo xhelozi ekzistoka edhe sot. E vërtetova këto ditë.
Ama kurrë nuk e kam kuptuar se përse.

F.P.

P.S.

Ne edhe si shoqëri jemi parazitë dhe bukëshkelës…